Mit Blotere a de Füess vo dene blöde Flipflops hanis doch no weder zrugg is Hostel gschafft.
Und mage tatsächlich no schribe :-) Dänke grad a die Jungs wo i dem Momänt im Schützenhouse gas gänd :-) Hoffe ihr stossid mol uf mi a ;-)
Zerscht hani eigentlich gar nöm welle los weli müed gsi be... has mer am Tisch mit es paar Franzose und eme Ängländer gmüetlich gmacht gha und ha eigentlich nur schnell i lade uf de andere Strossesite welle go es Bierli hole... de hani die Lüt atroffe wo grad för d Pub Crawl gstartet sind und ha mi irgendwie lo öberrede mitzcho... hihi zum glöck beni mitgange :-)
Australier, Südafrikaner, Neuseeländer, Ängländer, Belgier, Amis... alles heds debi gha... Mer sind vo eim Pub us nöchste und öberall heds Bier för 2$ gä... die erschte sind scho nochem 2. Pub weder hei :-)
Ich be no chliiiiii länger blibe...
Wo mer am morge am 4i zum letschte Pub us cho sind hed mi de eint (isch glaubs e ängländer gsi) nur aglachet und seid zue mer: "youre a fucking legend man!" Warschinlich weli erscht am nomi am 3 glandet und 28h uf de Bei gsi be und trotzdem mit allne andere mitghalte ha... oder vilicht au us andere gründ ;-)
No am gliche obe hani de kurzerhand entschiede dasi hött tue usschlofe und so de Jetlag chli tue öberwinde... obwohls ned sooo schlimm gsi isch...
Hött morge hed mi de am 10ni de Zimmerservice gweck... ha mi de am au mol 11i zum näscht us gschwunge und be mol go luege was am obe so lauft... Ha mi de för Irgendöppis mit Webster Hall igschribe... Wie das gsi isch schribi de morn...
Nochär hani es kafi gno und öberleid wasi mit dem tag no mache... ha eigentlich ned so möge und mi entschiede ich chönnt ja chli go d Nachbarschaft aluege...
Also kurzerhand de Rucksack packt und be los richtig süde... denn weste... de beni meh oder weniger "zuefällig" a Central Park äne glaufe und ha dänkt... ja weni scho do be, de chönnti ja dä mol chli go aluege... also beni mol chli im Park omenand glaufe... ha mi immer chli richtig südoste orientiert...
Irgendwenn isch denn halt dä park fertig gsi, und ich ha dänkt... ja weni scho do be, de chönnti ja no chli witer d stadt dörab... ich chli witer glaufe... bis i denn irgendwenn gmerkt ha, dasi gar ned südwärts, ostwärts laufe... be grad so uf höci 3rd avenue gsi... und ha dänkt... ja jetz beni so wit cho, jetz muesi aber glich no chli südwärts laufe...
also beni de doch no gen süden glaufe... ha mol chli d avenue gwächslet... d lexington isch no cool, det heds vel lüt...
Und irgendwenn hani de plötzlich s Chrysler Building gse use stäche, und wel das mis Lieblingsgebäude i de ganze stadt isch hani dänkt... ja weni scho so wit cho be, de chönnti ja au no chli nöcher äne go... also beni glaufe und witer glaufe, es paar föteli gmacht... und dänkt aso wenn s Chrysler Building do stod isch s Empire State au ned wit wäg... be drum mol öbere uf d 5th Avenue glaufe und peng... Staaaat doch daaaa e Kiosk!!! Hihi nei... natürlich s Empire State isch det gstande... und ich ha so dänkt... ja weni scho so wit cho be, de chönnti eigentlich au grad no det uf d Plattform ufe... also beni witer glaufe... und ine, Zerscht uf de "Skyride" sone Virtuelle Flug öber NY... das hend alli müesse mache wo ufs Dach hend welle... huere kack gsi... aber was solls... Nochär witer, 1. Lift ufe... öberall chli asto... öberall stönd lüt wo ständig ihri Sätzli wederholid... do müender döre, det müender warte, do chönder zahle... und so witer... die machid de ganz tag nüd anders als det sto und d lüt iwiise... öppis USA-typischers als das gids för mich ned... es isch unglaublich wie vel vo dene Lüt die hend... die hend för alles en Iwiiser wo de ganz tag nüd anders macht als sis sätzli abeliire... immer und immer und immer weder... s hed sogar e Fotograf gha wo nüd anders gseid hed als: "OK? Cheeeeeeese!" meh ned... de ganz tag... DE GANZ TAG! Unglaublich :-) aber was solls...
ha mi also dör alli iwiiser döre schlänglet und be de ändlich im 86te Stock acho... und ich säge üch... das lohnt sich halt scho wie nüd anders... Dä Usblick isch eifach Atemberaubend und me fühlt sich wörkli wie wenn me öber de Stadt wörd schwebe... Das ständige Ruusche, gmischt mit Polizeisirene und Autohuupi hani söscht no nienet uf de Wält ghört... Das isch eifach typisch New York... Be öppe 1h uf de Plattform gsi und a Probiert ganz bewusst e tüüfe Zug vo dem Spirit z nä...
Nochär beni weder abe und es isch wörkli wie es Itauche nochdem me vom Sprungbrätt gumpet isch... Öberall Lüt, Autos und wo witer... die Stadt Pulsiert... alli sind unterwägs... eifach Genial :-)
Useme Speziergang dör d Nachbarschaft isch e Monsterwanderig dör die halb Stadt worde :-) Und jede Schritt hed sich meh als glohnt :-) aber ebe... be de langsam müed gsi und nochere Verpflegig im Starbucks hani es Taxi zrugg is Hostel gno... Jetz goni de schnell go ligge und nochär machi mi för de Usgang fertig... Wird sicher weder lustig... hend sich mega vel lüt agmäldet...
Und morn machi de e Downtown Tour mit es paar Hostel Kollege...
Ihr ghörid morn weder vo mir :-)
Hebids guet und bis gli...
Luki Gump
Keine Kommentare:
Kommentar veröffentlichen