Au hött hanis also weder gschafft äne z hocke und z schribe... Wasi immer meh z schätze weis, isch die Freiheit, ohni druck chönne z mache was me wott und niemer störts was me wenn wie macht :-)
So... wo simmer gester sto blibe? Bim Usgang richtig? :-)
De fömer doch jetz weder mit dem a...
Gester ischs i d Webster Hall gange. Lüt vom Hostel hend det gratis itritt gha... drum beni mit dene lüt mit... Zerscht simmer mit de U-Bahn weder zemli wit abe gfahre. Isch no schräg gsi... am tag hani e halbi ewigkeit gha und nochär fahrsch mit de U-Bahn i 20min glich wiit :-)
Bim Union Square simmer de use... irgend so e dütschi hed sich meini so druf gfröit, das sie de Lead öberno hed und alli hend "müesse" ihre hintenoche laufe... de hani de au usegfunde das doch tatsächlich no e zwöite schwizer debi isch :-) Zwar chli e schräge vogel... wases nebenbei bemerkt do im hostel rächt oft gid... läck heds do zum teil schrägi vögel hey! Chönnt e tag demit verbringe nur i dene zue z luege...
aber zrugg zu de Webster Hall...
Irgend einisch simmer de dinne gsi... hend chli d Floors abchecket uund so witer... mer hend usegfunde, das ufem einte Floor de Vodka lemon 9 Stutz choschtet und ufem andere nur 5... es witers Kapitel i de Gschicht "Typisch USA" :-) Hihi und wenn mer grad bim alkohol sind... hihi mer hend no e Brasilianer debi gha... eigentlich 19ni aber gfälschte Uswiis und FUSCHTDICK heders hinter de ohre gha... 1 Schluck alkohol und achtung, fertig LOS! Alles was bis de ned uf de Bäum gsi isch isch atanzet worde... Dä siech isch schlimmer gsi als de Hugu Bugu im Vollrusch :-) E riese Legände! :-) Isch rächt e coole obe worde und irgendwenn so um die 3 ha ich mich de abgseilet... Be no chli nordwärts glaufe weli no öppis z ässe ha welle bsorge... isch warschinlich ned sooo e gueti idee gsi :-) Irgendwo uf Höchi vom Flatiron Building isch mer eini entgäge cho und frogt mi so öb ich schnell ihre Nacke chöig aluege... sie heig det e Wunde... und hed welle wösse öb si tüüf isch... und öb ihri Nase no blüeti hed sie au no welle wösse... D nase hed nöme blüetet, aber de Cut am Nacke isch rächt deftig gsi...
Wie das Passiert isch hani ned usegfunde... welle wösse hanis eigentlich au ned... aber ich ha de mol schnell es Taxi äne gwunke und s ässe uf de nöchsti Tag verschobe :-)
Hött morge beni am 7ni scho weder ufgstande... am 8i isch schliesslich im Dave sini berüemti Downtown-Tour los gange... Dasmol simmer wörkli bis ganz zunderscht abe a Zipfel und hend scho mol e Blick uf d Freiheitsstatue gworfe... Dänke wirde de am mäntig d Fähre nä und das ganze chli nöcher aluege... Nochär simmer chrüz und quer dör downtown glaufe... und öppe all 20meter hemmer weder aghalte wel de Dave (ebe üse Guide) Weder hed müesse dörezelle... natürlich ned nur einisch... sondern 2-3 mol... und jedes mol ischer ufnes anders Resultat cho :-) Das vor allem wel s einte Spaniöggu Meitschi partout ned hed welle bi de Gruppe blibe und ständig weder irgendwo verlore gange isch... Isch sowieso e schrägi Gruppe gsi... chum öppis gredt oder gfrogt worde und weder heds so schrääääägi huere Vögu debi gha... Aber ich be au ned wäg de Lüt det gsi, sondern wäg de Tour, und die isch wörkli no cool gsi... Ganz vel Insider tips und anekdote und sehr vel inputs wasi no chönnt go nöcher aluege...
Uf de Liste stod ganz sicher au no d Brooklyn Bridge... häi isch scho idrücklich... und d Sicht vo det uf Manhattan mues genial si... Baui au i mini Mäntigs-Tour i :-)
För üs ischs de aber witer gange richtig ground zero... au das isch mega idrücklich gsi... Inere Chile grad näbedra hends so e art es Memorial Museum igrichtet... (för die wos mol gse hend, die Chile wo de Hag vore dra mit Bilder etc. vollkomme bedeckt gsi isch) Isch zwar alles extrem Ami-Patriotisch präsentiert gsi, aber trotzdem unglaublich idrücklich... Bsonders wel ich dä hag 5 Mönet noch de Aschläg sälber no gse ha... und wenn me de nochär hintere cho isch zum eigentliche Ground Zero ischs genau so idrücklich z gse was si wend drus mache... De Bau isch in vollem Gange und ich be gspannt wies usgsed weni s nöchste mol verbi chome :-)
Mir sind de nochär witer nordwärts richtig Tribeca und Soho... beides ganz schöni gägende und teilwiis so ruhig, das me fascht ned glaubt, das 2-3 Blocks entfärnt Ground Zero isch oder d Wall Street oder was au immer... Das isch sowieso extrem spannend a dem Teil vo de Stadt... innerhalb vo 2 Blocks cha s ganze Ussehe vo de Umgäbig wörkli drastisch ändere, und jedes Viertel hed sine ganz eiget Charme...
Wönsche e gueti zit un bis gli :-)
Luke
Keine Kommentare:
Kommentar veröffentlichen