Hey fellas...
Ha dänkt ich schribe no schnell do ine bevors de witers a Pub Crawl god :-)
Häi... isch e turbulänti Reis gsi... und e witzigi...
Zerscht verpennt... tami! Am morge am 3 nochdem alles Packt und s Partyfolk Video gschnitte gsi isch s Iphone igsteckt und lo aktualisiere... und go penne... das letschte stündli Schlaf hani mer schliesslich ned welle lo entgo...
Wasi ned gwösst ha isch gsi, dass das cheibe öpfu-telefon nocheme Update sperrt und me zerscht weder mues aktiviere... und dases bis denn kei Pieps vo sich gid...
Ok egal... uf de Zug gstresst, trotzdem easy 75min vorem Start det gsi... Icheckt... z schwäre koffer häiäiäi... wie machi de das erscht bim hei cho? Oder bim witerreise uf Orlando? Mues tatsächlich no e 2. Koffer go kaufe...
ok 150.- abtugget und ab vors Gate, und ab denn isch de alles chli smoother glaufe...
S Geilste isch ja gsi, das mer GENAU aber wörkli GANZ GENAU öber Dagmerselle ine gfloge sind...
Ha glaub sogar d Partyfolk-Arena gse :-) läck isch die Schwiz chlii us es paar Kilometer höchi...
Z Genf beni zwöscheglandet und gli weder i de Luft gsi... isch scho es rächt schrägs gfühl gsi... ganz elei d Schwiz z verlo, aber woni mer vorgstellt ha dasi i öppe 8h öber d Brooklyn Bridge ine fahre ischs de plötzlich rächt geil gsi :-)
Im Flüger hani de Joseph, oder öbersetzt de Sepp könneglehrt... de Sepp isch e 2 Jährige Ami/Mexikaner-Bueb wo sim Mami de ganz Flug hindurch, hintere und vöre im Flugzüg devo gsecklet isch... Söscht hanis mit mim Französische Sitznachber eigentlich rächt guet troffe gha...
Jaaa und jetz beni do... i de geilste Stadt vo de Wält... am nordwestliche Zipfel vom Central Park... Scho es paar Wort mitem Koreanische Zimmergenosse ustuschet... es Pfüüsli gmacht und jetz machi mi de Ready för alles was no chond :-)
Fröie mi scho uf morn... Wasi gnau mache weisi nonig... ich glaube si machid do vom Hostel us e Tour dör d Bronx... wär glaubs no sehenswärt...
Also... haltet die Ohren Steif und bis gli...
Schlukinho
Keine Kommentare:
Kommentar veröffentlichen